~ EyeBrows ~ أساسيات الحواجب ~

2:50:00 م

~ الحواجب ~

شكل الحاجب و لونه يأثرو هلبا على ملامح و تفاصيل الوجه , منهم الزوز يتغيرو ملامحك سواء هادية و بريئة او حادة و قاسية و لو اخترتي الشكل و اللون الغلط ليك ح يقعد منظرك مش حلو و حاد .

ح نحكيلكم على كل لون شعر و شن يمشي معاه لون حواجب .

بس مش شرط كل ما تصبغي شعرك , تصبغي معاه حتى حواجبك ! مع المكياج و منتجات الحواجب المختلفة تقدري تغيري لونهم بشكل طبيعي و حلو .

لون حواجبك المناسب لك :-

- الشعر الأشقر : لون حواجب رمادي فاتح / أو / أشقر مائل لي الرمادي .

- الشعر البني الفاتح أو العسلي : بني فاتح بكل ( أفتح من لون الشعر يعني ) / أو / رملي .

- الشعر القهوي : لون خشبي / أو / لون بندقي .

- الشعر الأسود : بني غامق / أو / رمادي داكن مائل للأسود .

- الشعر الرمادي : رمادي افتح / أو / لون صخري او حجري .

- الشعر الأبيض : رمادي / أو / أشقر مائل لي الرمادي .

- الشعر الأحمر : أشقر مائل لي الرمادي / أو / لون الكراميل .

درجات الألوان هادي لو أن هدا لون شعرك الأصلي أو صابغتيه من الجذور بس لو صبغتي الشعر و خليتي الجذور على لونهم الطبيعي ف استعملي لون الحواجب المناسب لي لون جذور شعرك.

ركزن على ان بداية الحاجب لازم يكون لون أخف من نهاية الحاجب باش مايقعدش منظرك حاد و قاسي و مش مريح للعين .

ابعدي كل البعد على التاتو الدائم او زرع شعر الحواجب ! و بس استعملي منتجات تجميل و علاجات تكثيف الحواجب .

المنتج المناسب حسب كثافة شعر حواجبك :-

- الشعر الخفيف : في بدال ما تزرعي شعر او اديري تاتو حواجب الأفضل أنك تستعملي جل حواجب ( يتوفر عند اغلب الماركات و ماركة أنستازيا مشهورة بيه هلبا ) اختاري اللون المناسب ليك و ارسمي نظام الشعرة شعرة و خودي قلم ادكن بشوية و ارسمي شعرة شعرة على الأماكن اللي فيها شعر خفيف بكل و هكي ح يعطيك شكل كأن درتي تاتو بس بشكل حلو و طبيعي.

- الشعر متوسط الكثافه : ارسمي حواجبك بقلم خاص للحواجب ( أو جل لو تحبي ) فيه نوعين من اقلام الحواجب فيه اللي يجي كريمي زي Brow wiz من أنستازيا او نوعية الأقلام التانية اللي تكون شمعية أكثر زي أقلام العين .

هادو حسب أنتي و ارتياحك بس بالنسبة ليا نفضل الأقلام الكريمية .