~ Healthy Life Flawless Skin ~
3:30:00 م~ صحة أحسن تعني بشرة أجمل ~
اكيد لي بشرة حلوة لازم يكون جسمك من الداخل كويس و تعطي فيه في الحاجات
المهمة و المفيدة ليه و تبعدي كل البعد على الحاجات اللي ممكن اضره .
مع الأسف نديرو في واجد حاجات غلط و اضر في صحتنا بدون ما نركزو فيهم
.
ف ح نعطيكم شوية حاجات اديروهم و حاجات تبعدو عنهم او تنتبهو ليهم لي جسم
صحي أكثر و بشرة أحلى .
حاجات مهمة للجسم و تعكس انعكاس حلو ع البشرة :-
- ممارسة الرياضة :
الرياضة مهمة هلبا لي صحة جسمنا و لي صحة الجلد , تعزز من عمل الدورة
الدموية و زيادة معدل ضربات القلب و إرتفاع الأكسجين .
العرق اللي يسببه الرياضة ح يزيل الشوائب من الجسم.
20 لي 30 دقيقة يوميا من الرياضة كافيين لتقوية جهازك المناعي . النشاط
المنتظم يساعد على تحويل الدهون الى كتلة عضلات و تعزز الأيض و تساعد من ابطاء
عملية التقدم في السن.
- النوم :
خلال النوم خلايا الجسم تقوم بتجديد و إصلاح نفسها بس أمتا
نرقدو لي ساعات غير كافية أو بطريقة غير منتظمة و مع السهر ف هكي حني نحطو في
جسمنا تحت ضغط كبير و يمكن يسبب صداع , تهيج , نقص الطاقة عندنا أو عدم القدرة على
التركيز و غير أن الجلد يبدا أقل مرونة و أكثر تعرض لظهور حب الشباب او الطفح
الجلدي و غيرهم من الأمراض الجلدية .
حاجات مضرة للجسم و لي جمال البشرة :-
- الشمس :
التعرض لي أشعة الشمس الزائد هو العدو الأول للبشرة لأنه يسبب
الشيخوخة المبكرة و التجاعيد , فقدان مرونة البشرة و التصبغ و التعرض الزائد للشمس
ممكن يسبب سرطان الجلد ( عفانا الله و اياكم ) .
خففي من تعرضك لي الشمس و ضروري اديري واقي شمس , في الشتي مايقلش على
15 SPF و في الصيف مايقلش على 30 SPF .
- التوتر :
الجلد عادة يعكس الإجهاد و التعب و التوتر اللي نمرو بيهم ف ح يعطو تأثير سلبي على بشرتنا زي حب الشباب و مشاكل الجلد الأخرى .
ممارسة الرياضة يساعد في التغلب على التوتر و من المهم انك تعرفي
السبب الأساسي لي التوتر و تتغلبي عليه .
- القهوه :
قللي من شرب القهوه و السوائل اللي تحتوي على الكفايين لأنها تساعد
على ازالة الماء من الجسم و منع امتصاص الفيتامينات و المعادن .
الزوز هادو الحمد لله أغلب البنات عندنا مايديروش فيهم بس لا قدر الله فيه من غلطت او لي صحة شاب تعرفيه :
- التدخين :
تدخين السجائر حتى هو مسؤول على الشيخوخة المبكرة للجلد ,
النيكوتين ( مادة موجودة في الدخان ) يعوق الأوعية الدموية الي تغدي الجلد مع
الأكسجين و المواد الغذائية ولي التخلص من الشوائب و مع التدخين ح يصير اختناق
للجلد و يبدا منظره شاحب و مافيشي حياوية ( لو تركزو في المدخنين مش ح تلقو حد
بشرته فيه حيوية ) و البشرة تفقد مرونتها .
- الكحول :
غير انهم ( حرمهم ربي ) ف استهلاك الكحول المفرط يمكن انه
يسبب مشاكل للجلد و خاصة أمراض الحساسية ( الشري و الطفح الجلدي ) بعض الناس
حساسين لاساليسيلات و هو مركب موجود حتى في الفواكه الحمراء , الموز , الفاصوليا و
العنب يعني لو بعد تناولك للحاجات هادي بشرتك تحسست معناها اكيد ح تتحسس حتى من
الكحول .
نصائح :-
- شرب 8 لي 10 اكواب من الماء يوميا يساعد على تخلص الجسم من السموم و
الحفاظ على بشرة جميلة مهما كان نوع بشرتك .
- ابتسمي , كوني ايجابية , تنفسي بعمق و كل بين فترة و فترة خودي عطلة و
ريحي فيها جسمك و عقلك .
1 التعليقات
روعه الموضوع حبيبتي استمري
ردحذف