~ YVES ROCHER FOND DE TEINT ~ كريم أساس ايف روشي ~
2:59:00 مTeint Creme Confort
ايف غوشي هي ماركة فرنسية تصنع منتجات تجميلية طبيعيه 3>
منتجاتها تخص المرأه بجميع
أعمارها و احتياجاتها من منتجات العناية بالجسم , الوجه , الشعر , العطور و حتى
المكياج
وعندهم قسم رجالي .
منتجاتهم خالية من العطور اللي تتكون من الكحول , عطورهم من النباتات
و الحاجات الطبيعيه يعني اللي تتحسس من العطور هادو ح يناسبوها سواء منتجات فيهم
عطور او العطور ( الباغفا ) بنفسهم 3> و هادي حاجة حبيتها هلبا لأني نعاني ديما
من المنتجات اللي تكون فيها عطور و بشرتي تتحسس منهم .
عندهم عدة أنواع من كريم الأساس و اليوم ح نحكيلكم على comfort cream foundation
الكريم هدا اللي يناسب البشرة الجافة و العادية أكثر من انه يناسب المختلطة
و الدهنية .
لأنه يعطي شكل دوي يعني لمعة للوجه بس مش مدهنة , لمعة صحية و حلوة
3>
و يحتوي على زيت نبات القرطم , و فيتامين اي .
يخلي البشرة مرطبه .
الكريم مجرب من قبل دكاترة الجلدية و مش مجرب على الحيوانات 3>
البشرات المختلطة تحط عليه بوردة اطفي اللمعة بس الدهنية لو بتحطه
بتحط بودرة كل شوية لأن ح يدهن معاها.
اني بشرتي مختلطة و نحط فشوية بودرة عليه يقعد حلوو 3> بس بعد كم
ساعة لازم نعدل بالبودرة لأن ا لتي زون عندي يلمع.
ثباته كويس يقعد لي ساعات ( قعدت بيه لي مدة سبعة ساعات و قعد حلو
بس طبعا يبي تعديل بي بودرة لأنه دهن )
قوام الكريم ثقيل بس ك تغطيه ماحسيتهاش ثقيله واجد يعني تغطية متوسطه و
يمكن مع الطبقات تولي عالية بس مش واجد بكل .
اللي عندها عيوب في بشرتها واجد ننصحها انها تتفاداه لأن من اللمعة
اللي فيه تحسي ان الاضاءه تتركز على كامل وجهك و تبرز العيوب .
لو مسامات واسعة او حفر ديري برايمر تحته .
لو تصبغات صححي بمصحح
قبله بس لو حبوب ح يبرزهم اكثر .
الفاونديشن بصفة عامة حبيته 3>
بس ماحبيتش ان فيه ريحة قوية اول ما
ينحط بس بعد دقايق تمشي الريحه.
بعد ما تمسحيه يحتاج جهاز تنظيف للوجه و تلقو الموضوه هنا او غسول
عميق باش يتنظف كويس.
عندهم ثمانية درجات اربعة على اندرتون اصفر و اربعه وردي .
درجتي فيه افتح شي لي الاندرتون الأصفر و رقمها BEIGE100
لو بشرتك فاتحه زي أول ما تحطيه ح تلقيه فاتح بس مع الدمج يقعد زي لون
بشرتي و لأن الدرجة الأدكن أغمق مني.
ننصحكم بيه لي طلعات مهمه او كنوع من التغيير و لي المنابسات 3>
و مع برايمر ح يقعد لي فترة أطول و أحلى أكيد .
دمتم في رعاية الله أحبتي 3>
0 التعليقات