~ WINTER FAVORITES ~ مفضلاتي للشتاء ~

7:52:00 ص

مفضلاتي لي موسم الشتاء

حبيت نبدا فقرة جديدة اللي هي بعد كل موسم او كل شهر ( لو حبيت مجموعة منتجات ) نشارككم مفضلاتي لي الفترة هديكا و ليش حبيتهم , سواء كانو مكياج او منتجات عناية بشرة/شعر .

و هادو المنتجات اللي ستعملتهم في فصل الشتاء و حبيتهم 3>

- - فاونديشن wonderful cushion من سيفورا :

– حبيت الفاونديشن ( كريم الأساس ) هدا هلبااا لأنه خفيف ع البشرة و يرطبها و مع التثبيت المزبوط يقعد معاك لي فترة طويلة , يعطي فنش طبيعي يعني مش مطفي ولا يلمع و هدا اهم شي في موسم الشتاء.

- - كونسيلر سيفورا :

الكونسيلر ( خافي العيوب ) هدا عشقي لي هالموسم , اكثر منتج حبيته و مش قادرة نستغني عليه , يطول هلبا ع الوجه , ثابت , و فيه نسبة ترطيب .

- - الباودر الفاتحة من ess bronzing powder :

الباليت هدا فيه ثلاثة درجات , برونزر و لون فاتح بشوية لمعة و لون مائل لي الرمادي مفروض ينفع للكونتور بس فيه لمعة , الباورد الفاتحة حبيتها هلبا لي تثبيت الكونسيلر , مشت مع كونسيلر سيفورا هلبا و خفيفة ماتتكثلش .

- - باليت الكونتور من نيو لوك :

الباودر متاعه خفيفه و ناعمة , يتكون من لون برونز و كونتور و لون فاتح اللي هوا لون البنانا , البنانا حبيتها لي الاضاءة تحت العين او حتى ك أي شادو و لون الكونتور حبيت درجته هلبا , ساهل الدمج و نستعمل فيه حتى لي تحديد العين.

- - فكس بلس من ماك :

فوائده عديدة بس حبيت انه يرطب الوجه قبل المكياج و يشيل شكل الباودري بعد ما نكمل المكياج و لو في نص اليوم حسيت مكياجي خرب شوية , نرش منه و نطبطب بالبيوتي بلندر و ترا مكياجي تصلح , و طبعا نرشه ع فرشة الاي شادو و اللون يطلع واضح هلبا.

- - مزيل مكياج بايوديرما :

يستعمل ك تونر و مزيل مكياج للبشرة الحساسة بس اني نستعمل فيه بس لي مسح المكياج . طبي و احسن ما فيه ان يشيل المكياج بعمق و حتى المكياج اللي ضد الماء و مايجففش البشرة.

- - مزيل مكياج عيون من سيفورا :

المزيل هدا من الكولكشن الجديد , ضد الميه بس يشيل المكياج بعمق و فيسع , حتى الماسكارا او الاي لاينر اللي ضد الماء القوي صعب المسح هدا يمسحه بسهولة .

- - ماسكارا ايسنس :

الماسكارا هادي حبيتها هلبا و حبيت الشكل اللي تعطيه ليا بس تنبيه ره مش لي استعمال يومي لأنها ثقيلة و مع الاستعمال اليومي اطيح في الرموش.

- باليت ROME من سيفورا :

الباليت هدا نزل مع ثلاثة باليتس اخرين في موسم رأس السنة , بس هدا اكثر واحد نستعمل فيه لأن الوانه طبيعيه اكثر ف ديما نحب نحدد بيهم عيني و نحب نستعمله لي عدة لوكات مختلفة.

- - الأرواج :

ثلاثة ارواج حبيتهم و مشو معاي في موسم الشتاء هلبا ( شفايفي جافين هلبا يعني في الشتاء مش أي روج نحبه ) بالنسبة لي الألوان الشتوية الغامقة اكثر زوز حبيتهم هما M.A.C SPICE IT UP و KIKO 924 الزوز ثابتين , مايجففوش الشفايف و لونهم شتوي رائع.

- و الروج اللحمي الهادي KIKO 926 , من نفس الكولكشن .

- اقلام تحديد الفم :

قلم ايسنس لونه داكن شتوي SOFT BERRY 05 و التاني من ماركة NEW LOOK 75 لونه بودري ناعم . الزوز ثابتين هلبااا و حلوين سواء بروحهم او بخلطهم مع روج اخر.

- - شمعة من ايكيا :

ريحتها تهبللل , حبيتها هلبا بس مع الاسف ريحتها و هي طافيا اقوى من ريحتها و هي والعه , ريحها كرز و توت . نحب نخليها قريبة مني وقت ما نرقد ريحتها تريح الاعصاب .

- و بس هادي هي مفضلتي لي موسم الشتاء , شاركوني مفضلاتكم على الانستقرامwissal.s.s

0 التعليقات