~ تصبغات البشرة ~ ✨

أغلبنا يعاني من تصبغات في بشرة الوجة او من عدم توحيد لون الوجة 😅
قليل بكل وين نلقو بشرة وجه نفس اللون كلها " يا بختها اللي هكي 😍✨ " من عدة اسباب ~ الجو - الحرارة - وراثية و غيرها ~
فيه عدة حلول و الأفضل الاتجاه لأخصائي جلدية و ينصحك بي كريمات او علاجات في العيادات .
أو ماسكات توحيد اللون و النظارة .
نجو للحلول المؤقتة بالمكياج 💞
لو عندك تصبغات واضحة و قوية سواء أثاء حبوب او حرق او هالات او احمرار و درتي عليهم كونسيلر مش ح يخبيهم بالعكس ح يطلع اللون مش حلو و الاغلب بيقلب رصاصي 😒
ف الأهم أنك تستعملي كوركتر ع مكان التصبغات " مصحح الألوان " يتوفر عند أغلب الماركات بي مجموعة ألوان ( دائرة الألوان تسهل عليك فهم الموضوع )
~ اللون الأخضر ☘ يندار على أماكن الاحمرار لي كسر اللون و تصحيحه و امتا تحطي فوقه كونسيلر او حتى بس فاونديشن اللون ح يطلع نفسه .
~ اللون البرتقالي 🍊 على الأماكن الداكنة في الوجة زي الهالات و حوالين الفم او لي تصبغات البشرات السمرة بس لو كانو هالاتك خفاف او بشرتك بيضاء ننصحك تبعدي ع البرتقالي القوي ميلي أكثر للمشمشي ح يطلع طبيعي اكثر و اخف .
~ اللون الأصفر 🍋 لي تفتيح المنطقة لأن اللون هدا يضوي و يعطي انارة للمكان ✨
~ نصيحة :~ ماتكتروش من اللون هلبا على اي مكان لأن ح يصعب عليكم الدمج و يمكن يقعد لونه مش تمام بعد الفاونديشن او الكونسيلر .
شوية من اللون بس يكفي تغطية العيوب 😍
فيه عدة باليتس من ماك و نيكس و ميك اب فورايفر تحتوي على مجموعة الألوان مع بعضها و فيه اللي يبيع فيهم كل لون بروحه على حسب احتياجات الشخص 💞